SIRAMAN CALON PANGANTEN
ENDEN LINDA NOVIANTY ARZANI ZAELANI |
Assalamualaikum Warohmatullohi Wabarokatuh
Puji sinareng syukur mangga
urang sami-sami panjatkeun ka Dzat Illahi Robbi anu parantos nakdirkeun ka
Urang sadayana kempel dina ieu acara siraman
Neng Enden
Linda
Anu dina
dinten enjing manawi pareng Gusti alloh bade ngalaksanakeun walimatul Nikah.
Shalawat sareng salam mugia
tetep dilimpahkeun kajunjunan urang sadayana Nyatana Habibana wanabinaya
Muhammad Rosullulloh Saw. Teu kakantun ka para kulawargana para sohabatna ka
para pengikutna anu tumut sareng taat kana ajaran mantena tug dugi ka urang
sadayana sing dicatet umat mantena anu balukarna engke di yaumal akhir kenging
syapaat sareng pertolongan mantena. Amin Ya Robbal Alamin.
I.
Kawih ( Hamdan)
Hamdan lirobbil’alamin
Allohurrohman Warrohim
Qod qorobba fatul mubin
Innahu huwassami’ul alim
Nu maha welas tur heman
Gusti, mangka muka pura bagja
Allohu Ya Robbi,
Mantena Maha Uninga
Solawat-Solawatan
Barokat-Barokatan
‘ala Muhammad Rosululloh
Wa’alaa alihi Wasohbihi
Salam sinareng solawat
Muga netes ka Muhamma
Natrat ka para karabat
II Mapag Calon
Panganten Istri
( Calon panganten dipapag Ku dua sepuhna saterasna dicalikkeun dina
korsi panganten kalayan diaping ku dua sepuhna)
Narasi
Pameget
Asa kakara kamari, hidep
gumelar ka alam pawenangan. Moal lawas dina tungtung sawangan. Harita,
basa wanci keur meujeuhna cangra, taun 1990 Masehi
katompernakeun. Ecesna bulan Januari
.poe ka 3
Nya harita pisan hidep mimiti ngagoar ilaharna hiji jabang bayi anu
anyar gelar, duka ngarasa reuwas atawa awahing ku bungah, hidep nyorang hiji
alam anu samemehna can kungsi kasaba. Hidep dibageakeun ku rasa kabungah anu
taya papadana. Bungah kagiri-giri, bungah amar watasuta, bungah nu teu aya
babandingannana.
Anaking jimat awaking, pamohalan nepi ka lali, barang gubrag oge,
aweuhan adan jeung qomat, langsung ditompokeun kana dua cepil hidep. Angkanan
teh hidep isuk jaganing geto baris jadi istri anu soleh, kalayan pageuh nyepeng
ajaran agama tur darigama. Cindekna hidep sing jadi istri raspati, kalayan
mibanda kajembaran manah, kaleubeutan hate, sangkan naon rupa papasten anu
tumiba teh luyu sareng kereteg ciptaning ati.
Nepi ka detik ayeuna, umur hidep teh kurang leuwih 21 taun, 297
poe, 5 jam 24 menit, 17 detik. Aya hiliwir ti angin peuting, aya beja ti
munara cahya, aya balabar kawat ti marcapada. Cenah hidep rek mapag hariring
dangding nu keur meujeuhna sumedeng nyanding, rek mapag haleuang sora nu ayeuna
geus dipiboga. Hidep geus katewak jamparing asih tur kaheman nu ngadadak nalaktak
sukma. Hidep rek ngalenkah kalayan mawa harepan endah. Atuh nya tangtu, bagja
dina ranggeuman rema, bungah na seuseup deudeuh. Sapanjang lengkah
pikahareupeun, kasawang pinuh jukut ngemploh hejo, ngembat lir alketip buludru,
nu bakal nilaman suku tina cucuk. Katumbiri nu melengkung di langit cangra,
mayungan katresna, ngaraketkeun duriat, beureum, hejo, koneng, gandola, murub
mubyar nyawer tali asih.
Narasi Istri
Barang gelar ka alam dunya, hidep gasik ku mamah dirungrum pinuh kadeudeuh. Deudeuh anaking, jabang bayi anu
masih keneh beureum ku dadami, enggal dirawu, dipangku kalayan pinuh
kabingahan.Asa sirna kacape mamah ngakandung hidep salami salapan sasih, basa
ningali hidep lahir kalawan sehat, sarta mulus rahayu berkah salamet
Kiwari hidep parantos ageung, pangdunga mamah sareng bapa,
nelengneng-gung, nelengneng-gung, geura gede , geura jangkung, geura nyangking
elmu nu luhung, geura mikanyaah indung.
II.
Ngumbah Sampean Ibu
( Gambaran rasa hormat hiji putra kanu
janten ibu, naha
bet ka ibu heula ? hal ieu oge diluyukeun sareng tungtunan ajaran Islam. Dina
hiji riwayat. Kantos aya sohabat anu tumaros ka Nabi Muhammad SAW: Yaa
Rosululloh, man ahaqu bihusni sohabat? Rosululloh SAW ngawaler teh apan tuang
ibu heula, dugi ka tilu kali. Teras anu ka opatna, nembe tuang rama.)
saparantos ngumbah, dielapan, tug dugi nyuhunkeun dihapunten nyium panangan
sareng sampean ibu
Narasi Istri
Anaking jimat awaking, sok hidep geura sungkem ka tuang ibu, anu
parantos ngandung. Pek hidep geura mundut sihapunten tina samudaya kalepatan,
Mugi balungbang timur, caang bulan opatwelas, jalan gede sasapuan. Da upami tea
mah hidep bade ngawangsulkeun cai pinarep nu tuang ibu, tangtos moal kadugi.
Hidep oge nyuhunkeun pidu’ana ti tuang ibu, dina dinten enjing bade nyorang
jatukrami.
Ibu abdi seja kumawantun, neda ampun nyaparalun, mun tea diemut ku
abdi, salapan sasih ibu ngakandung abdi, gubrag kaalam dunya teu lepas tina
pangaping, pangjaring ibu, gentel keak ngurus abdi, teu siangna teu wengina,
dugi ka abdi dewasa, namung naon atuh nu tiasa dihaturkeun ka ibu ku abdi iwal
ti neda dihapunten tina sagala rereged ku kungsi karandapan ku abdi, neda agung
cukup lumur nedahapuntenna, abdi rumaos mung matak ngajaheutkeun manah salira
ibu, rumaos janten putra anu teu ngabakti kanu janten ibu, danget ieu abdi neda
du’ana mudah-mudahan abdi tinekanan.
III.
Ngumbah Sampean Rama
(Ngumbah sampean rama
dielapan dipungkas ku neda dihapunten bari
nyium panangan sareng sampean tuang rama)
Narasi ( Mangrupi hiji sajak )
Bapa
Jog-jog anjog ka golodog
Nyampeurkeun
lunjaran kolot
Nuruban
bangbarung
Sangkan henteu
lali ka Hyang Widi
Bapa,
Basa tikukur
ngelik,
Lawang sigotaka
muka
Carita naratas
bewara.
Aya beja ti
awing-awang,
Sanghyang medar lalakon
Bapa, kuring moal poho,
Kana sora puter jeung dederuk
Nu nitah wirid ka Nu Maha Agung
Bengrasna sanghyang beurang,
Nitah sumujud ka Nu
Kawasa
Panakon manuk,
Nuruban samak anyam-anyaman
Widian kuring leumpang,
Rek ngukur sora tikukur,
Rek ngalenyepan sora dederuk,
Bapa, kuring
sumujud
IV.
Nyiraman
Calon Panganten
(Ieu acara
puncak, Calon panganten dijajap ka tempat siraman anu tos disiapkeun
sapuratina. Cai dina genrong, minangka cai anu leubeut ku pangdu’a, diguyurkeun
ku ibuna, ramana, wargi-wargi, tug dugi ka anu mikadeudeuh ka neng….. Ahirna Calon panganten teh wudlu ku eta
cai. Eces pisan budaya sunda diluyukeun sareng ajaran Islam )
V.
Du’a
( Acara
siraman parantos tuntas dipungkas ku du’a)
Tidak ada komentar:
Posting Komentar